Tuyaqush yog‘i bo‘g‘im og‘rig‘i va radikulitni davolaydimi?
- 4 days ago
- 2 min read
turli biologik faol mahsulotlar mo‘jizaviy davo sifatida targ‘ib qilinmoqda. Shunday reklamalardan biri “Uncha muncha” Telegram kanalida e’lon qilinib, unda tuyaqush yog‘i bo‘g‘imlardagi og‘riqlarni bartaraf etishi, radikulitni davolashi, mushaklarni tiklashi hamda bo‘g‘imlar harakatchanligini yaxshilashi aytilgan.
Ammo bu da’volar ilmiy dalillar bilan qanchalik tasdiqlangan?
Da’vo
Reklamaga ko‘ra, tuyaqush yog‘i:
bo‘g‘im og‘rig‘ini yo‘qotadi;
radikulitni davolaydi;
mushaklarni tiklaydi;
bo‘g‘imlar harakatchanligini yaxshilaydi.
Tuyaqush yog‘i nima?
Tuyaqush yog‘i (ostrich oil) tuyaqush terisi ostidagi yog‘ qatlamidan olinadi. Uning tarkibida omega-3, omega-6 va omega-9 yog‘ kislotalari mavjud bo‘lib, ayrim kosmetik vositalarda terini namlantirish va yumshatish maqsadida qo‘llaniladi.
Ba’zi laboratoriya tadqiqotlari va kichik klinik sinovlarda tuyaqush yog‘ining yallig‘lanishga qarshi xususiyatlari o‘rganilgan. Biroq bu natijalar mahsulotning bo‘g‘im kasalliklarini davolashi isbotlanganini anglatmaydi.
Ilmiy tadqiqotlar nima deydi?
2025-yilda o‘tkazilgan randomizatsiyalangan klinik tadqiqotda tizza osteoartriti bilan og‘rigan 90 nafar bemorda tuyaqush yog‘ining ta’siri o‘rganilgan. Tadqiqot natijalariga ko‘ra, ayrim bemorlarda og‘riq va qotishish darajasi kamaygani kuzatilgan. Biroq tadqiqot mualliflarining o‘zi ham ushbu yo‘nalishdagi ilmiy dalillar hali cheklanganligini qayd etgan.
Bundan tashqari, bu tadqiqot faqat tizza osteoartriti bilan bog‘liq bo‘lib, reklamada aytilgan radikulit, mushaklarning tiklanishi yoki barcha bo‘g‘im kasalliklariga taalluqli emas.
2026-yilda chop etilgan yana bir klinik tadqiqotda tuyaqush yog‘i surtmalarining surunkali anal yoriqlar bilan bog‘liq og‘riqni kamaytirishi mumkinligi qayd etilgan. Ammo bu tadqiqot ham bo‘g‘im og‘rig‘i yoki radikulit bilan bog‘liq emas.
Radikulitni davolashi haqidagi da’vo-chi?
Radikulit — umurtqa pog‘onasidan chiqadigan nerv ildizlarining siqilishi yoki yallig‘lanishi bilan bog‘liq kasallik.
Hozirgi kunga qadar tuyaqush yog‘ining radikulitni davolashi yoki nerv ildizlaridagi yallig‘lanishni bartaraf etishini tasdiqlovchi ishonchli klinik tadqiqotlar topilmadi. Shu sababli reklamadagi bu da’vo ilmiy jihatdan asoslanmagan.
Mushaklarni tiklaydimi?
Mushaklarning tiklanishi murakkab biologik jarayon bo‘lib, unga jismoniy mashqlar, dam olish, oqsil va boshqa oziq moddalarning yetarli qabul qilinishi ta’sir qiladi. Tuyaqush yog‘ining mushak to‘qimalarini tiklashi yoki mushak faoliyatini yaxshilashi haqida ishonchli klinik dalillar mavjud emas.
Ba’zi odamlar yog‘ bilan massaj qilgandan keyin o‘zini yaxshi his qilishi mumkin. Biroq bu holat ko‘pincha massajning o‘zi bilan bog‘liq bo‘lib, mahsulotning davolovchi xususiyatlarini isbotlamaydi.
“100 foiz tabiiy” mahsulot davolaydimi?
Reklamalarda ko‘pincha “100 foiz tabiiy”, “Arabistonda ishlab chiqarilgan” yoki “tabiiy davo” kabi iboralar qo‘llaniladi. Biroq mahsulotning tabiiyligi uning samaradorligi yoki davolovchi xususiyatlarini avtomatik ravishda tasdiqlamaydi. Tibbiyotda har qanday davolash usuli klinik tadqiqotlar orqali sinovdan o‘tkazilishi va samaradorligi isbotlanishi kerak.
Xulosa
Tuyaqush yog‘i kosmetik vosita yoki massaj uchun ishlatilishi mumkin. Ayrim kichik tadqiqotlarda uning yallig‘lanishga qarshi va og‘riqni kamaytiruvchi xususiyatlari qayd etilgan. Ammo reklamada aytilganidek, bo‘g‘im og‘rig‘i, radikulit yoki mushak kasalliklarini davolashi ishonchli ilmiy dalillar bilan to‘liq tasdiqlanmagan.
Shu sababli iste’molchilar bunday reklamalardagi da’volarga tanqidiy yondashishi va surunkali og‘riqlar yuzasidan shifokor bilan maslahatlashishi tavsiya etiladi.
